FILE PHOTO: Ang biglaang pagbaha o flash flood sa Davao City dahil sa malakas na pag-ulan nitong gabi ng Miyerkules, Hunyo 05, 2013 . (RITCHIE TONGO / Photoville International)

MANILA, Philippines — Patuloy na makararanas ng mga pag-ulan ang malaking bahagi ng bansa ngayong araw dahil sa epekto ng southwest monsoon o hanging habagat.

Paliwanag ng PAGASA, walang direktang epekto sa Pilipinas ang tropical storm Dante subalit pinalalakas nito ang habagat na siya ngayong nagdudulot ng mga pag-ulan sa malaking bahagi ng bansa.

Alas-4 kaninang madaling araw, huling namataan ang Bagyong Dante sa layong 1,030 kilometro hilagang silangan ng Basco, Batanes.

Taglay pa rin nito ang lakas ng hanging aabot ng 75 kilometro kada oras (kph) at pagbugsong pumapalo ng 90 kph.

Pinapayuhan ang publiko na magdala ng payong at pananggalang dahil sa mga pag-ulan na posibleng maranasan sa bansa partikular sa bahagi ng CALABARZON, Bicol at MIMAROPA Regions pati na ang western at central Visayas.

Bahagya namang magiging maulap ang Metro Manila at makararanas ng pulu-pulo o isolated thunderstorms sa dakong hapon o gabi.

Sa pagtaya ng PAGASA, posibleng lumabas sa Philippine area of responsibility (PAR) ang bagyong Dante bukas, (Martes).

Paglilinaw naman ng PAGASA, hindi pa opisyal na umiiral ang panahon ng tag-ulan dahil hindi pa naaabot ang criteria upang ito’y maideklara sa kabila ng pagpasok ng bagyong Dante. (UNTV News)

FILE PHOTO: Habagat’s aftermath: According to National Disaster Risk Reduction and Management Council (NDRRMC), at least 95 people have died, while 62,846 have been rescued and more than 3.4 million people have been affected last August 2012. (REY TAMAYO JR. / Photoville International)

MANILA, Philippines — Puspusan na ang ginagawang paghahanda ng pamahalaan para makamit ang target na zero casualty sa pagpasok ng panahon ng tag-ulan.

Sinabi ni DILG Secretary Mar Roxas, mahalagang malaman ng mga residente sa bawat barangay ang mga dapat gawin at lugar na dapat puntahan tuwing may kalamidad.

“Para malaman nila saan sila lilikas, so yung mga palatandaan na dapat antayin bago sila lumikas, ano yung mga crisis areas at vulnerable sa pagtaas ng tubig.”

Ngayong araw ay pinulong na ni Roxas ang iba’t ibang ahensiya ng pamahalaan para sa isasagawang mga training at flood drill sa mga barangay.

Ayon sa kalihim, mahigpit nilang tinututukan ang may 60 libong pamilya na nakatira malapit sa mga water ways sa ibat-ibang lugar sa Metro Manila, kabilang ang Parañaque, Taguig, Pasig, Pasay, Maynila, Malabon, Valenzuela at Makati.

“Ipinamahagi  din natin sa kanila itong mga plano na ito, ang bawat komunidad ay magkakaroon ng plano na ito at malalaman nila na batay sa pagbagsak ng ulan sa QC, Rizal at Montalban batay sa DOST-Project Noah ay malalaman nila kung ilang talampakan, tuhod, hita ang pagtaas ng tubig mula sa baba hanggang sa kinalalagyan nila,” ani Roxas.

Sa kasalukuyan ay pinag-aaralan na rin ng pamahalaan ang pag-relocate sa mga residenteng malapit sa mga water way para sa kanilang kaligtasan. (Lea Ylagan & Ruth Navales, UNTV News)

FILE PHOTO: Katuwang sa paglilikas sa ating mga kababayang binaha sa Davao City ang mga kawani ng PNP-Davao at mga local rescuers.(DOMINIC ZAFRA / PHOTOVILLE International)

MANILA, Philippines – Kasabay ng pagdedeklara ng PAGASA sa pagpasok ng tag-ulan sa bansa, nakahanda na rin ang mga tauhan ng Philippine National Police (PNP) upang umalalay sa mga lugar na lumulubog sa baha.

Ayon kay PNP Spokesperson Chief Supt. Generoso Cerbo Jr., binuo nila ang Oplan Saklolo para sa agarang pagbibigay tulong sa mga kababayan natin na maaapektuhan ng pag-ulan, pagbaha at bagyo sa bansa.

“Ito’y ipapatupad namin nationwide at kinakailangan ang involvement ng lahat ng local PNP units natin hanggang sa level ng mga municipal police stations.”

Sinabi pa nito na handa na rin ang kanilang mga gamit at rubber boats para sa rescue operations.

“Sa kahandaan meron po tayong mga equipment na maari namang gamitin, in terms of training naman at kasanayan ng ating mga pulis marami sa kanila ay specially trained sa nga ganitong klase ng gawain, subalit ang malaking naitutulong ng mga tauhan natin ay ung aming presence sa lahat ng area at pagbibigay ng babala at manpower at distribution ng relief goods,” pahayag pa ni Cerbo.

Panawagan ng PNP sa publiko, makinig sa instructions ng mga otoridad kung kinakailangan nang lumikas sa kani-kanilang lugar sa panahon ng kalamidad. (Lea Ylagan & Ruth Navales, UNTV News)

Ang Philippine Coast Guard rescuers sa isang pagsasanay sa pagsagip ng isang nalulunod. Ito ay isinagawa sa PCG HQ sa Maynila nitong Biyernes, June 07, 2013. FILE PHOTO. (PHOTOVILLE International)

MANILA, Philippines – Naghahanda na rin ang pamunuan ng Philippine Coast Guard (PCG) sakaling magkaroon ng kalamidad ngayong panahon ng tag-ulan.

Sa katunayan, ay nag-inspeksyon na kanina si Commandant Rear Admiral Rodolfo Isorena sa lahat ng kanilang response and rescue equipment upang matiyak na nasa maayos pang kondisyon ang mga ito.

“Yung inspection natin is in showdown of equipment, in preparation for the rainy season in fact panay na ang ulan di ba, tinitingnan natin yung kahandaan ng ating PCG na tumugon sa anumang sakuna na dadating para sa pagpasok ng rainy season ngayong taon.”

Aminado naman ang opisyal na kulang pa rin sila sa gamit tulad ng search and rescue vessels, choppers at islander plane.

Kulang din ang kanilang mga tauhan upang rumesponde sa iba’t ibang sitwasyon tuwing dumadaan ang mga sakuna at kalamidad.

Dahil dito, maging ang mga atleta sa hanay ng PCG ay isasalang na rin sa search and rescue operations sakaling magkaroon ng malalakas na bagyo.

“Maraming kakulangan ang coast guard in terms of equipment and of course pati sa personnel but we make do of what available resources we have.”

Umaasa si Isorena na  sana’y dumating na ang sampung 40-meter vessel mula sa Japan at maaaprubahan na rin ang kanilang pondo para sa karagdagang 7 bagong helicopters. (Francis Rivera & Ruth Navales, UNTV News)

Ang nasusunog na factory ng foam sa Mandaue City, Cebu nitong Martes ng umaga. (UNTV News)

Mandaue City, Philippines – Sugatan ang isang lalaki matapos tumulong sa pag-apula sa nasusunog na pagawaan ng foam sa Mandaue City sa Cebu, umaga ng Martes.

Ayon sa Cebu City Fire Department, posibleng nag-leak na Liquefied Petroleum Gas (LPG) ang pinagmulan ng sunog.

Ayon naman sa manager ng Mars Foam Manufacturing Corp na si Violi Lim, possible ring faulty electrical wiring ang sanhi ng sunog.

“Sa tingin ko ang wiring… sabi ng isang tao ko, kasi hindi ko alam na pinutol nila ang wire.”

Tinatayang aabot sa isang milyong piso ang pinsala ng nangyaring sunog. (Naomi Sorianosos & Ruth Navales, UNTV News)

MTSAT ENHANCED-IR Satellite Image
4:32 p.m., 12 June 2013 (www.pagasa.dost.gov.ph)

MANILA, Philippines — Kasunod ng paglabas ng bagyong Dante sa Philippine area of responsibility (PAR), isa na namang low pressure area (LPA) ang inaasahang mabubuo sa West Philippine Sea ngayong araw.

Ayon sa Philippine Atmospheric, Geophysical and Astronomical Services Administration (PAGASA), patuloy na nilang binabantayan ang nagbabantang sama ng panahon at ang magiging epekto nito sa bansa.

Sakaling maging ganap na bagyo, papangalanan itong “Emong” na posibleng makaapekto sa buong Luzon.

Ngayong buwan ng Hunyo, dalawa hanggang tatlong bagyo pa ang inaasahang papasok sa bansa. (UNTV News)

National Disaster Risk Reduction and Management Council (NDRRMC)

MANILA, Philippines – Magsasagawa ang National Disaster Risk Reduction and Management Council (NDRRMC) ng isang Evacuation and Disaster Management Summit.

Ayon kay NDRRMC Spokesman Major Rey Balido Jr., tatalakayin ng ahensya sa mga alkalde at gobernador ang hazard map para sa paghahanda kapag may mga kalamidad.

Pag-uusapan din sa summit ang mga papel na gagampanan ng bawat lokal na opisyal upang makamit ang target na zero casualty kapag may sakuna.

Posibleng simulan ang nasabing summit kapag nakapanumpa na sa tungkulin ang mga bagong halal na opisyal sa bawat lalawigan. (UNTV News)

FILE PHOTO: Ang sumadsad na Cebu Pacific Flight 5J971 sa Davao International Airport. (RITCHIE TONGO / Photoville International)

MANILA, Philippines — Tapos nang suriin sa Singapore ang flight data recorder ng Cebu Pacific Flight 5J971 na sumadsad sa runway ng Davao International Airport noong nakaraang linggo.

Ayon sa Civil Aviation Authority of the Philippines (CAAP), posibleng maibalik na sa bansa ngayong araw ang nasabing recorder mula sa Singapore subalit hindi pa nila agad mailalabas ang resulta ng pagsusuri.

Sa pagtaya ng CAAP, posibleng maisapubliko ang ulat sa susunod na linggo.

Tiwala naman ang CAAP na susuportahan ng resulta ng pagsusuri sa Singapore ang kanilang initial findings na pilot error ang dahilan ng aksidente batay na rin sa kanilang nakuhang mga ebidensya. (UNTV News)

FILE PHOTO: Bonifacio Global City at night. (ERWIN GO / Photoville International)

MANILA, Philippines — Inoobliga ng Department of Interior and Local Government (DILG) ang mga gusaling nakakabit sa gas system ng Bonifacio Global City sa Taguig na ipasuri ang kanilang gas pipeline.

Ang direktiba ng DILG ay bunsod ng naganap na pagsabog sa 2 Serendra condominium sanhi ng gas leak na ikinasawi ng tatlo katao.

Ayon kay DILG Secretary Mar Roxas, ang Bureau of Fire Protection (BFP) at Taguig City government ang maglalabas ng listahan ng mga iinpeksiyuning gusali.

Sa tala na nakuha ng mga otoridad, 61 gusali ang nakakabit sa gas system ng Global City at labindalawa dito ay residential buildings na may kabuoang 2,327 units.

Nasa 49 naman ang commercial buildings na may 258 establishments na gumagamit ng centralized gas system, karamihan ay mga restaurant.

Bukod sa mandatory checkup, obligado na rin ang mga gusali na maglagay ng sensor at detector na ikakabit sa isang automatic shutoff system.

“Yan ang standard, if gusto nilang tumuloy sa gas connection. Kung di eksperto ang nagkabit baka makasama pa, kaya need check.”

Target ng DILG na matapos ang check-up sa linya ng gas ng bawat building sa katapusan ng Hulyo.

Babala ni Roxas, sino mang hindi susunod sa naturang kautusan ay papatawan ng kaukulang aksyon sa ilalim ng fire code at Taguig City local code.

“We will shut them down. Ayon sa mga eksperto kahit konting gas maaring magbigay ng ganoon kalakas na puwersa.” (Victor Cosare & Ruth Navales, UNTV News)

Ang pagbaha sa Manila area kahapon na nagdulot ng mga kanselasyon ng mga klase dahil sa malakas na mga pag-ulan. (PHOTOVILLE International)

MANILA, Philippines — Patuloy na makararanas ng pag-ulan ang malaking bahagi ng bansa ngayong araw hanggang sa weekend.

Sa ulat ng PAGASA, partikular na maapektuhan ng southwest monsoon o hanging habagat ang Luzon at Visayas bagama’t nakararanas din ng pag-ulan ang ilang bahagi ng Mindanao.

Paglilinaw ng PAGASA, hindi bagyo kundi hanging habagat lamang ang umiiral sa bansa na siyang nagdudulot ng mga pag-ulan lalo na sa dakong hapon o gabi.

Samantala, dahil sa pagbuhos ng malakas na ulan kahapon, Huwebes, maraming lugar sa Metro Manila ang nalubog sa baha.

Bunsod nito, maraming paaralan ang nagkansela ng klase kahapon kabilang na ang University of Sto. Tomas (UST), San Beda College, University of the Philippines-Manila, Far Eastern University, FEU East Asia College, Adamson University at City College of Manila.

Nagkansela rin ng klase kahapon ang San Sebastian College, Dela Salle University, DLS College of St. Benilde, Saint Paul University-Manila, Philippine Women’s University, University of the East-Manila, Saint Scholastica’s College, Saint Jude College at Philippine College of Criminology.

Ngayong araw naman, nag-anunsyo na ang University Of Santo Tomas sa kanilang twitter account na kanselado pa rin ang pasok ng mga estudyante sa lahat ng antas pati na ng faculty at staff. (UNTV News)

Bukod sa mga kanselasyon ng klase ay ang mabibigat na trapiko dahil sa ang mga motorista ay hindi isasakripisyo ang kanilang mga sasakyan na ilusong sa baha. (SOPHIYA BALUYOT / Photoville International)

Ang lumubog na barkong MV Lady of Mount Carmel o Barko Masbateño na kuha noong April 04, 2013. (HANDOUT FILE PHOTO :  Albay Governor Joey Salceda )

MASBATE CITY, Philippines — Nasa 54 na pasahero ng lumubog na MV Lady of Mount Carmel sa Masbate ang nailigtas na ng Philippine Coast Guard (PCG).

Ayon sa PCG, 6 na pasahero na lamang ang kasalukuyang pinaghahanap samantalang 2 ang kumpirmadong  nasawi.

Kinilala ang dalawang nasawi na sina Carlita Zeña, 50 anyos, residente ng bayan ng Baleno, Masbate at Erlinda Julbitado, 59 anyos, nakatira sa Pasig City.

Kabilang naman sa anim na nawawalang pasahero sina Abegail Barredo, Noan Manokan, Leticia Andaya, Arianne Comidor, Jonas Comidor, at Fe Rapsing.

Kasama din sa lumubog na barko ang dalawang bus ng Isarog Lines at isang truck.

Ayon sa PCG, karamihan sa mga pasahero ay pauwi na sana sa bayan ng Placer at sa bayan ng Baleno sa Masbate.

Ang mga nasagip na pasahero ay pansamatalang dinala sa bayan ng Aroroy Municipal Clinic upang ma-check up.

Sa ngayon ay katuwang na ng Coast Guard sa search and rescue operation ang BFAR vessel na MCS 3006, local government rescue boat at Bantay Dagat Aroroy at ilang Philippine Navy vessel. (Gerry Galicia & Ruth Navales, UNTV News)

FILE PHOTO: Ang bahagin ito ng España Boulevard na lumubog sa baha nitong Huwebes ng hapon dahil sa pag-ulan. (SOPHIYA BALUYOT / Photoville International)

MANILA, Philippines — Nakalatag na ang mga proyekto ng Department of Public Works and Highways (DPWH) na inaasahang lulutas sa problema ng pagbaha sa kalakhang Maynila ayon sa Malakanyang.

Nasa ilalim ito ng master plan flood control project ng DPWH na nagkakahalaga ng P352 billion.

Pero ayon kay Presidential Communications Development & Strategic Planning Office (PCDSPO) Sec. Ricky Carandang, aabutin pa ng ilang taon bago maramdaman ng taumbayan ang magandang epekto ng kanilang proyekto kaugnay ng paglutas sa mga pagbaha partikular sa Metro Manila.

Kasunod ito ng naranasang mga pagbaha sa malaking bahagi ng National Capital Region (NCR) na naging dahilan rin ng matinding daloy ng trapiko sa mga lansangan ng Metro Manila.

Ayon kay Carandang, kabilang sa plano ng pamahalaan ang relokasyon sa may 20-libong pamilya na naninirahan sa mga estero sa Metro Manila.

Kinakailangang ilikas ang nasa 100-libong informal settler upang maisakatuparan ang master plan ng DPWH.

Wala naman daw dapat ipangamba ang mga mare-relocate na pamilya dahil bibigyan sila ng matitirhan ng gobyerno.

“Syempre hindi mu pwedeng basta-basta iitsapwera ang mga informal settlers, you have to provide them alternate housing and if you have to move them away from their locations were there working you need to find them some livelihood.”

Ayon pa kay Carandang, may mga hakbang nang ginagawa ang MMDA at DPWH at isa na dito ang paglilinis ng mga estero.

Sa kabila nito, kinakailangan pa rin aniya ang tulong at suporta ng publiko upang malunasan o mabawasan ang mga pagbaha sa kanilang mga lugar. (Nel Maribojoc & Ruth Navales, UNTV News)

Ang isa sa 35 bahay na dinaanan ng buhawi nitong hapon ng Martes sa bayan ng Minglanilla sa Cebu. (JAMES VERCIDE / Photoville International)

CEBU CITY, Philippines – Umabot sa 35 bahay ang nasira dahil sa pananalasa ng buhawi sa bayan ng Minglanilla sa Cebu pasado alas-2 ng hapon nitong Martes.

Ayon sa mga residente, wala pang isang minuto ang itinagal ng buhawi subalit maraming bahay ang nasira.

Nawalan rin ng kuryente ang mga apektadong lugar dahil nabuwal ang ilang poste ng kuryente.

Marami ring nagkalat na kahoy dahil sa pananalasa ng buhawi.

Laking pasasalamat naman ng mga residente at walang nasawi o nasugatan sa pangyayari. (Naomi Sorianosos & Ruth Navales, UNTV News)

Ang salpukan ng Partas at Roval buses sa EDSA-Buendia, Makati, nitong Huwebes ng gabi. (UNTV News)

MAKATI CITY, Philippines – Dalawampu’t anim ang sugatan sa nangyaring salpukan ng dalawang pampasaherong bus sa kahabaan ng EDSA-Buendia sa Makati, gabi ng Huwebes, June 20.

Ayon sa driver ng Partas Lines, nakatigil ang kanyang minamanehong bus nang bigla umanong sumalpok sa kanyang likuran ang bus na Royal Transit.

Agad namang naisugod sa pagamutan ang mga pasahero na karamihan ay nagtamo ng sugat sa ulo.

Mabilis namang tumakas ang driver at konduktor ng bumanggang bus pagkatapos ng pangyayari.

Sa ngayon ay inaalam na ng mga otoridad ang pagkakakilanlan ng tumakas na driver at konduktor pati na ang mga kaso na posibleng kaharapin ng mga ito. (Benedict Galazan & Ruth Navales, UNTV News)

FILE PHOTO: Ang hinihinalang bangkay ng 1 sa 7 nawawalang sakay ng lumubog na MV Lady of Mt. Carmel sa Masbate, natagpuan Brgy. Catburawan, Ligao City, Albay nitong Huwebes, June 20, 2013. (ALLAN YANGA MANANSALA / Photoville International)

MANILA, Philippines — Umakyat na sa 37 ang bilang ng mga namatay dahil sa pagkalunod mula buwan ng Enero hanggang Mayo ngayong taon.

Batay sa tala ng Philippine Coast Guard (PCG), pinakamaraming insidente ng nawawalang tao kaugnay ng pagkalunod ay sa buwan ng Abril kung saan kasagsagan ng summer season.

Ayon kay PCG Deputy Spokesperson ENS Donna Duran, mas lalo silang naka-alerto ngayong panahon ng tag-ulan dahil sa mga pagbaha.

“Nagstart na po yung rainy season, especially during sa hapon na mas malakas na yung ulan so dapat mas maging alerto sila lalo na sa mga bahain na mga areas.”

Nito lamang nakalipas na Hunyo 8 (Sabado), walo ang iniulat na nawawala habang 3 ang namatay dahil din sa pagkalunod bunsod ng paglubog ng barkong MV Lady of Carmel malapit sa Burias Island sa lalawigan ng Masbate.

Suportado rin ng PCG ang plano ng gobyerno na pag-aalis at pag-relocate sa mga informal settlers sa mga waterways o daluyan ng tubig sa Metro Manila.

Ayon kay Duran, ang mga daluyan ng tubig gaya ng ilog at estero ang unang binabaha tuwing malakas ang ulan at may bagyo na kadalasan ring may naiuulat na nalunod.

Sa ngayon ay umaabot na sa 16 ang na-rescue ng PCG dahil lamang sa mga pagbaha.

“Sinusuportahan nga namin yung movement ng DILG na dapat magsilikas na yung mga tao na nakatira sa waterways para maiwasan na lalo na yung drowning kasi ito yung mga areas na unang binabaha,” pahayag pa ni Duran. (Francis Rivera & Ruth Navales, UNTV News)

Ang Philippine Coast Guard rescuers sa isang pagsasanay sa pagsagip ng isang nalulunod. Ito ay isinagawa sa PCG HQ sa Maynila nitong Biyernes, June 07, 2013. (PHOTOVILLE International)

FILE PHOTO: Ang Pasig River na kumukonekta sa Laguna de Bay at Manila Bay. (DARWIN DEE / Photoville International)

MANILA, Philippines — Patuloy na ang ginagawang pag-giba ng Laguna Lake Development Authority (LLDA) sa mga iligal na istruktura sa paligid ng mga ilog na konektado sa lawa.

Ayon kay Presidential Adviser on Environment Concerns at LLDA head Neric Acosta, layon nitong maibsan ang matinding pagbaha lalo pa’t nagsisimula nang maranasan ang malalakas na pag-ulan.

Ayon kay Acosta, target nilang maalis ngayong taon ang nasa 500 fish structure pati na ang nasa tatlong libong ektarya ng aqua structure sa Laguna Lake.

Nakikipag-ugnayan na rin ang LLDA sa Metropolitan Manila Development Authority (MMDA) at Local Government Units (LGUs) upang maiwasan ang pag-apaw ng tubig sa lawa gaya nang nangyari sa nakalipas na taon dahil sa epekto ng pinalakas na hanging habagat. (UNTV News)

Ang isa sa mga engineering students ng University of Santo Tomas (UST) habang idine-demo ang konsepto nilang V-shape wall sa Manila Bay na ngayon ay pinag-aaralan na ng MMDA at DPWH. (UNTV News)

MANILA, Philippines — Pinag-aaralan ngayon ng Metropolitan Manila Development Authority (MMDA) at Department of Public Works and Highways (DPWH) ang paglalagay ng isang v-shaped wall sa Manila Bay.

Ang V-shaped wall ay kahalintulad sa konsepto ng isang malaking dust pan kung saan maiipon ang basura na natatangay ng tubig sa Manila Bay lalo na kapag bumabaha o may bagyo.

Ang nasabing ideya ay mula sa engineering students ng University of Santo Tomas (UST) na nanalo sa katatapos lamang na Manila Bay cleanup competition.

Ayon kay MMDA Chairman Francis Tolentino, ginawa ang kumpetisyon upang hingin ang ideya ng ating mga kababayan sa solusyon sa basura sa halip na magbayad sa pagkonsulta sa mga foreign expert.

Matatandaang noong nakaraang taon ay nasira ng habagat ang seawall ng Manila Bay at naging malaking problema ang tone-toneladang basura na dala ng mga alon. (Robie Demelletes / Ruth Navales, UNTV News)

FILE PHOTO: Ang Singapore haze noong June 21, 2013. Sa kasalukuyan ay bumaba na moderate level ang ang Pollutant Standard Index kung saan ay medyo bumabalik na ang sigla sa mga tourist destination bagama’t pinapayuhan pa rin ng pamahalaan ng Singapore na ang mga tao ay magsuot ng N95 face mask. (PHOTO CREDITS: REUTERS)

SINGAPORE – Unti-unti nang bumabalik sa moderate level ang Pollutant Standard Index (PSI) sa Singapore matapos magbago ng direksyon ang hangin na nagmumula sa nasusunog na kagubatan ng Sumatra, Indonesia.

Maliwanag na rin ang himapapawid at bumubuti na ang kalidad ng hangin kasabay ng pagbabalik-sigla ng mga tourist destinations sa pagtatapos ng linggo.

Kapag bumaba sa 100 ang PSI ay maituturing na itong katamtaman o mabuti at maaari nang bumalik sa normal ang mga aktibidad ng mga mamamayan doon.

Samantala, namahagi na ang pamahalaan ng Singapore ng mga N95 face mask partikular sa mga mahihirap na mamamayan nito.

Tiniyak naman ni Singapore Prime Minister Lee Hsien Loong na makasasapat ang supply ng face mask para sa lahat.

Sa kabila nito, pinapayuhan pa rin ang mga matatanda, buntis at mga bata na iwasan ang pananatili ng matagal sa labas ng bahay.

Pinapayuhan rin ang mga may sakit sa puso at sa baga na iwasan muna ang anumang outdoor activities at magsuot ng N95 mask kung hindi maiiwasan. (Gelo Alejandro / Ruth Navales, UNTV News)

FILE PHOTO: Armed Forces of the Philippines Western Command Handout Photo: USS Guardian grounded at Tubbataha Reef

MANILA, Philippines — Inilabas na ng United States (US) Navy ang resulta ng imbestigasyon sa pagsadsad ng warship nito sa Tubbataha Reef sa karagatan ng Palawan noong Enero.

Batay sa ulat ni Admiral Cecil Haney, ang commander ng US Pacific Fleet, hindi pinansin ng watch team ng USS Guardian ang visual, electronic cues at iba pang alarma at umasa lamang sa maling digital nautical charts.

Aminado ang US Navy na nagkamali ang pinuno ng dating USS Guardian na naging sanhi ng pagkasadsad nito sa Tubbataha Reef.

Matagal nang tinanggal sa pwesto ang commanding officer at iba pang opisyal ng sumadsad na barko kasunod ng insidente.

Ayon sa Tubbataha Management Office (TMO), nasa 58-milyong piso ang halaga ng danyos na kailangang bayaran ng Amerika dahil sa pagkasira ng mahigit 2,000-metriko kwadrado ng corals sa Tubbataha Reef. (UNTV News)

A man smoking a cigarette is silhouetted against the haze-filled sky as he waits for a ferry bound for Malaysia’s Malacca, at Dumai port, Indonesia’s Riau province, June 22, 2013.
Credit: Reuters/Beawiharta

KUALA LUMPUR, Malaysia — Nagdeklara na ng state of emergency ang bansang Malaysia sa timugang bahagi ng Johor nitong Linggo.

Umabot na sa 750 ang pollution index doon dahil sa patuloy na pagkasunog ng kagubatan sa Sumatra, Indonesia.

Sinabi ni Malaysian Natural Resources and Environment Minister G. Palanivel, ang pasya ni Prime Minister Najib Razak na isailalim sa state of emergency status ang mga lugar ng Muar at Ledang dahil lubha nang mapanganib sa kalusugan ng mga residente ang makapal na usok doon.

“Prime Minister Najib Razak has agreed to declare emergency status in Muar and Ledang with immediate effect.”

Sa ngayon ay zero visibility na rin sa Kuala Lumpur, ang kapitolyo ng Malaysia at ayon sa ilang residente doon, lubha nang naapektuhan nito ang kanilang pang-araw araw na pamumuhay.

“I think this haze is very dangerous for us as Malaysians, as you can see this street is so, not so many people because there are many haze. The haze is so heavy now a days. So I think the haze has spoiled our daily activities,” pahayag ni Khairul, residente.

Samantala, sinabi naman ng mga opisyal ng Johor na handa sila sakaling ipag-utos ng national security council na ilikas na sa mas ligtas na lugar ang mga apektadong residente. (Marje Navarro / Ruth Navales, UNTV News)