Ang ilan sa mga kawani ng Philippine Coast Guard na nagtulongtulong upang maagapan kaagad ang pagkalat ng oil leak sa Ilog Pasig sa area ng Sta. Ana nitong Lunes, June 24, 2013. (CREDITS: Philippine Coast Guard)

MANILA, Philippines — Napigilan na ang pagkalat ng tumagas na bunker fuel sa iba pang bahagi ng Ilog Pasig sa Sta. Ana, Maynila.

Ayon sa Philippine Coast Guard (PCG), kontrolado na nila ang oil spill matapos lagyan ng boom at absorbent pads ang paligid ng oil depot.

Sinabi ni PCG Spokesman, Commander Armand Balilo na umabot sa halos dalawang kilometro ang nasakop ng kumalat na langis sa ilog mula sa Lambingan Bridge sa Sta. Ana, Maynila hanggang sa Nagtahan Bridge sa Sampaloc.

“Based dun sa latest report contained na ano, wala ng tumatagas at wala ng oil dun sa Pureza.”

Ayon naman kay Jesus Marzan, ang Manila City Administrator, mahaharap sa kaso ang may-ari at operator ng oil depot compound kapag natapos ang imbestigasyon sa insidente.

Batay sa sa isinagawang ocular inspection, napag-alaman na may nilabag ang kumpanyang LM Merchandise sa fire safety regulation at wala rin itong maipakitang permit at iba pang mga kaukulang dokumento.

“May nakita kami dito business plate, nung nagpunta nga dito yung representative hinihingi namin yung dokumento nila ayaw ipakita, wala pa sila maipakita.”

Samantala, sa isang panayam sinabi ni Presidential Spokesperson Sec. Edwin Lacierda na sa ngayon ay pinag-aaralan na ng Malacañan na muling buhayin ang panukalang ilipat sa ibang lugar ang mga oil depot na nasa loob ng Metro Manila.

“Yung isyung yan umakyat po sa Office of the President dahil sa City of Manila na batas na in-issue pwedeng umakyat sa Office of the President, pinagaaralan po yan ng Office of the Executive Secretary.” (Francis Rivera / Ruth Navales, UNTV News)

Philippine Air Force Spokesperson Col. Miguel Okol (UNTV News)

MANILA, Philippines — Hindi pa rin natatagpuan ang dalawang piloto ng bumagsak na eroplano ng Philippine Air Force (PAF) sa karagatang sakop ng Palawan nitong Linggo.

Ang OV-10 Bronco Light Reconnaissance o bomber aircraft ay bumagsak sa karagatan sa layong 18 kilometers mula sa airport ng Puerto Princesa City.

Ayon kay PAF Spokesperson Col. Miguel Okol, tuluy-tuloy pa rin ang search and rescue ng kanilang mga tauhan katuwang ang Philippine Navy at Philippine Coast Guard (PCG).

“We are still in the process of searching, we are looking at all angles right now and we are hoping we get a better result from this and we find them, right now your Air Force, the Coast Guard, Phil. Navy and all other elements is doubling their efforts to search the area.”

Sa isinagawang search and rescue ng PCG-Palawan, natagpuan ang unahang bahagi ng eroplano na palutang-lutang sa dagat sa lugar kung saan nawalan ng komunikasyon ang dalawang piloto nito sa Western Command.

Sa ngayon ay tumanggi muna ang PAF na pangalanan ang dalawang piloto at ang naging dahilan ng pagbagsak ng eroplano.

Nanawagan naman ang PAF sa mga nakatira sa baybayin na kaagad ipagbigay-alam sa kanila sakaling matagpuan ang dalawang pilotong nawawala at tumawag sa numerong 853-50-23.

Ang OV-10 aircraft ay nabili ng Philippine Air Force noong 1992 sa Thailand na ang pangunahing misyon ay sumuporta sa mga sundalo sa ground habang nakikipaglaban. (Lea Ylagan / Ruth Navales, UNTV News)

Ang batang nasagasaan ng tren sa Naga City na tinakpan na ng sako ng mga pulis. (ALLAN YANGA MANANSALA / Photoville International)

NAGA CITY, Philippines – Dead on the spot ang isang walong taong gulang na batang lalaki nang masagasaan ng tren sa Brgy. Lerma sa Naga City, Camarines Sur, Martes ng umaga.

Halos maghiwalay na ang katawan ng batang si Mark Angelo Bismonte nang makuha ng kanyang ama dahil sa aksidente.

Ayon sa mga saksi, hindi namalayan ng batang biktima na naglalaro sa tabi ng riles ang pagdating ng tren.

“Naka-neutral naman yung tren mahina ang takbo,” pahayag ni Augusto Llorin na nakasaksi sa insidente.

Pahayag naman ng ama ng biktima na si Mike Bismonte, hindi bumusina ang tren kaya hindi ito napansin ng kaniyang anak.

Sa ngayon ay hawak na ng mga otoridad ang operator ng tren na hindi muna pinangalanan. (Allan Manansala / Ruth Navales, UNTV News)

FILE PHOTO: Ang unahang bahagi ng Cebu Pacific Flight 5J971 sa Davao International Airport noong hindi pa ito naiaalis sa runway mula sa pagkakasubsob. (BOM DY / Photoville International)

MANILA, Philippines — Suspendido ng anim na buwan ang mga piloto ng eroplano ng Cebu Pacific na sumadsad sa runway ng Davao International Airport noong Hunyo 2.

Ayon kay Civil Aviation Authority of the Philippines (CAAP) Deputy Director-General Captain John Andrews, bukod sa anim na buwang suspensyon, isang taon ding hindi papayagang maging main pilot si Antonio Oropesa.

Tatlong buwan namang suspendido ang co-pilot nitong si First Officer Edwin Perello.

Sinabi ni Andrews na batay sa kanilang imbestigasyon, nabigo ang mga piloto na magpatupad ng emergency evacuation at inabot pa ng dalawampung minuto bago inilikas ang mga pasahero.

Hindi rin nakapagdeklara ng emergency at bigo rin ang mga pilotong gawin ang procedures sa kanilang manual.

Sinabi rin ni Andrews na lumihis sa runway at sumadsad sa runway ang eroplano nang ituloy ng mga piloto ang pag-landing kahit nawalan sila ng visibility dahil sa malakas na ulan.

Samantala, hindi pa magsasampa ng kaso ang CAAP sa pamunuan ng Cebu Pacific kaugnay ng insidente dahil patuloy pa umano silang nangangalap ng ebidensya.

Isasalang naman sa flight simulation at bulk landing ang mga flight crew ng kumpanya, bukod pa sa gagawing pagbabago sa turnaround time policy ng mga eroplano sa tuwing may emergency.

Magpapadala din ang CAAP ng flight inspectors sa cockpit para subaybayan ang operasyon ng airlines.

Tiniyak naman ng CAAP na ligtas pa ring sumakay sa mga eroplano ng Cebu Pacific bagama’t may ilang hakbang na dapat baguhin lalo na sa emergency evacuation. (UNTV News)

FILE PHOTO: Isa sa mga epekto ng climate change ay malakas at maraming pagbuhos na nagdudulot ng mga malawakang pagbaha. (REY MANLAPAS TAMAYO Jr. / Photoville International)

MANILA, Philippines – Pumangatlo ang Pilipinas sa mga bansang nanganganib sa mga sakunang dulot ng climate change.

Sa ulat ng World Bank (WB), nagbabala ito hinggil sa paglala ng iba’t ibang sakuna sa mundo bunsod ng patuloy na pagbabago ng klima ng daigdig.

Kabilang dito ang pagtaas ng sea-level, mas malakas na mga bagyo at sobrang tag-init sa ilang partikular na rehiyon sa mundo kabilang ang Pilipinas.

Ayon sa World Bank, sa katapusan ng ika-21 siglo, tataas ng hanggang labinlimang porsyento ang sea level sa timog-silangang Asya na nangangahulugan ng mas madalas at mas mataas na pagbaha.

Babala ng WB, pinaka-apektado rito ang mga informal settler partikular na ang urban population ng Pilipinas na nakatirik ang mga tahanan sa mga estero at iba pang waterways.

Kaugnay nito, hinikayat ng WB ang Pilipinas na dagdagan ang pondo para sa mga programang may kaugnayan sa climate change. (UNTV News)

CONTRIBUTED PHOTO: Ang bahagi ng OV-10 Bronco Light Reconnaissance na na-recover na ng Philippine Coast Guard ngunit di pa natatagpuan ang mga piloto na kinilalang sina Major Jonathan Ybanez at Lieutenant Abner Trustnacion. (PCG)

MANILA, Philippines – Hanggang ngayon ay hindi pa rin natatagpuan ang dalawang piloto ng Philippine Air Force (PAF) matapos bumagsak ang sinasakyan nilang eroplano sa karagatang sakop ng Palawan noong Lunes.

Kahit patuloy ang pagbuhos ng ulan ay nagsagawa pa rin ng underwater search operation ang mga diver ng Philippine Coast Guard (PCG) at Philippine Navy sa lugar kung saan ipinapalagay na bumagsak ang bomber aircraft na OV-10 Bronco Light Reconnaissance.

Muli namang nakakuha ng mga debris ang rescue team ngunit hindi pa matukoy ng mga otoridad kung ito ay bahagi ng bumagsak na eroplano.

Tiniyak naman ng mga otoridad na patuloy silang magsasagawa ng operasyon upang mahanap ang mga piloto na kinilalang sina Major Jonathan Ybanez at Lieutenant Abner Trustnacion. (UNTV News)

MTSAT ENHANCED-IR Satellite Image
9:32 a.m., 01 July 2013 (PAGASA.DOST.GOV.PH)

MANILA, Philippines — Nakalabas na ng Philippine Area of Responsibility (PAR) ang bagyong Gorio habang nagbabanta sa Southern China.

Sa pinakahuling weather bulletin ng Philippine Atmospheric, Geophysical and Astronomical Services Administration (PAGASA), lalo pang lumakas si Gorio habang patuloy na lumalayo sa kalupaan ng Pilipinas.

Taglay nito ang lakas ng hanging aabot sa 85 kilometro kada oras (kph) at pagbugsong aabot sa 100 kph.

Gumagalaw ito pa-hilagang kanluran sa bilis na 30 kph.

Bagama’t ibinaba na ang public storm warning signals sa lahat ng lugar sa bansa, pinapayuhan pa rin ng PAGASA ang publiko lalo na ang mga mangingisda na mag-ingat sa paglalayag sa western seaboards ng Luzon dahil sa malalakas na alon dulot ng papalayong bagyong Gorio. (UNTV News)

Ang Asiana Airlines Flight 214 na nag-crash sa paglanding nito sa San Francisco International airport nitong Linggo sa oras ng Pilipinas. (REUTERS)

MANILA, Philippines — Kinumpirma ng Philippine Embassy sa Amerika na kabilang ang isang Filipino-American at dalawang anak nito sa mga nasugatan sa bumagsak na Asiana Airlines sa San Francisco Airport.

Sa official twitter account ng US Philippine Embassy, tinukoy nito ang Fil-Am national na si Maricel Anino Knaus at dalawang anak nito na nagtamo ng sugat sa insidente subalit nakalabas na umano ang mga ito ng ospital.

“#Philippines Consul General Marciano Paynor Jr. identifies Filipino-American passenger as Maricel Anino Knaus of Fort Collins, Colorado.”

“#Philippines Consulate says Knaus and sons sustained injuries in crash but have already been discharged from San Francisco General Hospital.”

Sa ngayon ay naghihintay na ng balita ukol kay Knaus ang mga kaanak nito sa Cebu.

Samantala, personal namang humingi ng tawad ang pinuno ng Asiana Airlines sa mga kaanak ng dalawang Chinese teenager na nasawi sa insidente.

Kinausap din nito ang mahigit sa tatlongdaang pasahero ng naaksidenteng eroplano. (UNTV News)

MTSAT ENHANCED-IR Satellite Image 5:32 p.m., 10 July 2013 (PAGASA.DOST.GOV.PH)

MANILA, Philippines – Inalerto na ng National Disaster Risk Reduction and Management Council (NDRRMC) at Philippine Coast Guard (PCG) ang mga tanggapan sa mga rehiyon na posibleng maapektuhan ng Typhoon “Soulik” o Bagyong Huaning.

Kabilang sa mga inalerto ay ang regional offices ng Office of Civil Defense (OCD) sa Metro Manila, Cordillera Administrative Region (CAR), Ilocos, Cagayan Valley, Central Luzon, MIMAROPA at CALABARZON.

Samantala, ipinagbawal na ng Coast Guard ang paglalayag ng anomang uri ng sasakyang pandagat sa karagatan ng Batanes.

Huling namataan ng PAGASA ang Bagyong Huaning sa layong 1,240 kilometro (km) silangan ng Itbayat, Batanes. (UNTV News)

FILE PHOTO: An aerial view shows Tokyo Electric Power Co.’s (TEPCO) tsunami-crippled Fukushima Daiichi nuclear power plant in Fukushima Prefecture March 11, 2013. ( Credit: Reuters/Kyodo )

TOKYO, Japan – Kinumpirma ng Tokyo Electric Power Company (TEPCO) na tumaas pa ang radiation reading sa Fukushima Daiichi Nuclear Power Plant.

Bunsod nito, ipinatupad na ng Japan ang mas mahigpit na safety standards sa mga nuclear power plants sa buong bansa.

Taong 2011 nang ipasara ang halos lahat ng nuclear plants sa Japan dahil sa tsunami nuclear disaster.

Batay sa bagong safety standards, dapat makasunod sa requirements ng Nuclear Regulation Authority (NRA) ang mga planta kaugnay sa structure, systems at components ng nuclear plant.

Kabilang dito ang pagsasagawa ng severe accident countermeasures, paglalaan ng safety facilities at ang pagiging handa sa lindol at tsunami kung saan inoobliga ang mga nuclear plants na magtayo ng seawall.

Ngunit sa kabila ng paghihigpit, nangangamba pa rin ang mga mamamayan ng Japan at ang mga Pilipino doon sa panganib na maidudulot ng nuclear leak.

Pinangangambahan rin na posibleng abutin pa ng sampung taon ang radiation leak na banta sa kalusugan ng mga residente sa lugar.

Ayon sa mga eksperto, ilan sa mga long term effects ng exposure sa nuclear radiation ay pagkabaog, cancer, at genetic damage sa isang sanggol na ipinagbubuntis ng kanyang ina.

Sa ngayon ay patuloy pa rin ang ginagawang hakbang ng gobyerno ng Japan upang masolusyunan ang malaking problemang kinakaharap ng bansa. (Anthony Bayaton / Ruth Navales, UNTV News)

Ang pag-apulang ginawa ng Bureau of Fire Protection kasama ang iba’t-ibang fire brigade volunteers sa mga kabahayan nilamon ng apoy sa Bgy. Pio Del Pilar, Makati City nitong Huwebes ng umaga, July 11, 2013. (PHOTOVILLE International)

MAKATI CITY, Philippines — Mahigit 100 bahay ang natupok ng apoy sa Bgy. Pio Del Pilar malapit sa Makati Medical Center, alas-10:25 ng umaga, Huwebes.

Umabot sa general alarm ang sunog at idineklarang under control pasado alas-11 kaninang umaga at idineklarang fire out kaninang tanghali.

Mabilis na kumalat ang apoy dahil gawa sa light materials ang karamihan sa mga bahay.

Nahirapan ang mga bumberong apulahin ang apoy dahil sa malakas na ihip ng hangin.

Kasama sa mga rumesponde sa nangyaring sunog ang UNTV Fire Brigade.

Wala namang napaulat na nasawi o nasaktan sa sunog.

Nagpahayag naman ng tulong ang lokal na pamahalaan ng Makati sa mga nasunugang pamilya.

Sa ngayon ay nanunuluyan lamang sa mga tent ang mga nasunugang pamilya sa panulukan ng Urban Avenue at Dela Rosa Street.

Patuloy pang iniimbestigahan ng mga awtoridad kung ano ang dahilan o pinagmulan ng sunog. (Mon Jocson / Ruth Navales, UNTV News)

Umabot sa Makati Central Business District ang usok mula sa mga nasusunog na kabahayang malapit sa Makati Medical Center. (ELDON TENORIO / Photoville International)

MTSAT ENHANCED-IR Satellite Image
3:01 p.m., 12 July 2013 (PAGASA.DOST.GOV.PH)

MANILA, Philippines – Nakataas na sa signal no. 2 ang Batanes Group of Islands dahil sa Bagyong Huaning (Soulik).

Batay sa weather bulletin ng Philippine Atmospheric, Geophysical and Astronomical Services Administration (PAGASA) as of 11:00 AM kanina, huling namataan ang bagyo sa layong 410 kilometro (km) hilagang silangan ng Itbayat, Batanes.

Taglay nito ang lakas ng hanging nasa 165 km kada oras (kph) at pagbugsong umaabot sa 200 kph.

Nananatili pa ring nakataas ang signal number 1 sa Calayan at Babuyan Group of Islands. (UNTV News)

FILE PHOTO: Two women hug each other in front of a collapsed building in central Christchurch February 22, 2011. PHOTO: REUTERS

NEW ZEALAND – Niyanig ng magnitude 6.9 na lindol ang bansa at nag-iwan ito ng pinsala sa ilang malalaking gusali kabilang na ang parliament building.

Ayon sa US Geological Survey, natukoy ang sentro ng pagyanig sa layong 57 kilometro sa katimugang bahagi ng Wellington na may lalim na 6.3 miles.

Tumagal umano ng ilang minuto ang pagyanig dahilan upang pansamatalang itigil ang biyahe ng tren.

Wala namang naitalang nasawi sa nangyaring insidente. (UNTV News)

MTSAT ENHANCED-IR Satellite Image
9:32 a.m., 29 July 2013 (PAGASA-DOST)

MANILA, Philippines — Patuloy na makararanas ng mga pag-ulan ang Luzon, Visayas at Mindanao kahit walang bagyo.

Ayon sa Philippine Atmospheric, Geophysical and Astronomical Services Administration (PAGASA), epekto ito ng Low Pressure Area (LPA) sa bahagi ng Tacloban City at nakapaloob sa Inter-tropical Convergence Zone (ITCZ) na umiiral sa Palawan, Visayas at Mindanao.

Sa pagtaya ng Pagasa, patuloy na makararanas ng mahina hanggang sa katamtamang pag-ulan ang malaking bahagi ng bansa partikular na ang Bicol Region, MIMAROPA, Zamboanga Peninsula, Northern Mindanao, Visayas at Quezon Province na maaaring magdulot ng flashflood at landslide.

Ang Metro Manila ay makararanas din ng maulap na papawirin at maulang panahon kaya’t pinapayuhan ang publiko na magdala ng kaukulang pananggalang. (UNTV News)

FILE PHOTO: Ang labi ng dinaanan ng buhawi noong hapon ng June 18, 2013 sa bayan ng Minglanilla sa Cebu. (JAMES VERCIDE / Photoville International)

ILOILO CITY, Philippines — Tinutukan ng Regional Disaster Risk Reduction & Management Summit ang implementasyon ng mga proyekto ng gobyerno sa Western Visayas.

Ito’y matapos umabot sa halos 12-bilyong piso ang halaga ng mga nasirang imprastraktura at agrikultura dahil sa mga tumamang kalamidad sa rehiyon simula noong 2008 hanggang 2012.

Ayon kay Director Rosario Cabrera ng Office of Civil Defense Region 6, umabot sa P7,049,719,000 ang nagamit sa pagsasaayos ng mga nasirang imprastraktura sa Western Visayas, samantalang pumalo naman sa 4,894,816,149 ang halaga ng pinsala sa agrikultura sa rehiyon sa loob ng nakalipas na 5 taon.

Dagdag pa ni Cabrera, umabot sa 3,343,658 indibidwal ang naapektuhan ng mga kalamidad sa nasabing time frame.

Dahil dito, naglabas ng mungkahi ang National Economic and Development Authority (NEDA) Region 6 para sa mga local chief executive sa rehiyon na magpatupad ng mga proyektong makakatagal sa mga kalamidad.

Sinabi naman ni NEDA Region 6 Director Ro-Ann Bacal na magiging mabusisi sila sa pagsusuri ng mga proyektong ipatutupad sa Western Visayas.

“We really need to be proactive. We really need to implement our infrastructure projects well so that they are not easily destroyed,” ani Bacal.(Vincent Arboleda / Ruth Navales, UNTV News)

Ang Bahay Pamahalaan ng Bayan ng Kabuntalan sa Maguindanao Province na lubog sa baha. (HANDOUT PHOTO FROM: Bureau of Public information ARMM)

DAVAO CITY, Philippines – Umabot na sa mahigit 30,000 residente mula sa Central Mindanao ang apektado ng pagbaha dahil sa ilang araw na pag ulan.

Pangunahin sa mga apektadong lugar ang Cotabato City, Maguindanao Province, North Cotabato at Sultan Kudarat.

Nagsimulang tumaas ang tubig baha sa mga nabanggit na lugar bunsod ng tatlong araw na pag-ulan dahilan para umapaw ang ilog ng Rio Grande De Mindanao.

Sa Cotabato City, umabot na sa 25 barangay ang lubog sa baha dahilan upang suspendihin ang klase mula elementarya hanggang high school sa lahat ng paaralan sa lungsod.

Lubog din sa baha ang 14 munisipalidad sa Maguindanao at 7 munisipalidad sa North Cotabato.

Ang nasabing mga munisipalidad ay nakapalibot sa Liguasan Marsh na nauna na ring umapaw dahil sa mga pag ulan.

Tiniyak naman ng mga lokal na pamahalaan na mabibigyan ng relief goods ang mga apektadong residente. (Louell Requilman / Ruth Navales, UNTV News)

FILE PHOTO: Ang pagbaha sa isang lugar sa Bulacan na dulot ng isang bagyo. Ayon sa PAGASA nasa 3 hanggang 4 na bagyo ang inaasahang papasok sa bansa ngayon lamang buwan ng Agosto. (RODGIE CRUZ / Photoville International)

MANILA, Philippines — Tatlo hanggang apat na bagyo ang inaasahang  apasok sa bansa ngayong buwan ng Agosto.

Ayon sa Philippine Atmospheric, Geophysical and Astronomical Services Administration (PAGASA) na ang Agosto ang itinuturing na buwan ng pagpasok ng maraming bagyo sa Pilipinas.

Sinabi naman ng PAGASA na hindi lahat ng papasok na bagyo ay dadaan o tatama sa kalupaan.

Sakaling pumasok nga ang apat na bagyo sa Philippine Area of Responsibility (PAR) papangalanan ang mga ito na Kiko, Labuyo, Maring at Nando.

Samantala, masusing mino-monitor ngayon ng PAGASA ang Low Pressure Area (LPA) malapit sa Puerto Princesa City na posibleng maging bagyo sa loob ng 24 oras. (UNTV News)

A handout photo dated and released by Philippine Coast Guard (PCG) on 09 August 2013 shows aerial shot of fuel washed ashore at a coastal village in the town of Rosario, Cavite province, Philippines. Cavite Governor Johnvic Remulla said, some 3,000 coastal families in three Cavite towns have been affected by a massive fuel spill.

CAVITE, Philippines – Isinailalim na sa state of calamity ang Rosario, Cavite dahil sa oil spill.

Ayon kay Mayor Jose Ricafrente, idineklara ito kaninang umaga matapos maapektuhan ng tumagas na langis ang siyam na barangay sa lugar.

Aniya, paraan ito upang mapigilan ang mga mapagsamantalang negosyante na magtaas ng presyo ng mga pangunahin bilihin.

Sa kasalukuyan ay nagpaabot na ng tulong ang lokal na pamahalaan sa mga residente na sa dagat kumukuha ng kabuhayan.

Sa ngayon ay patuloy pa ang ginagawang imbestigasyon ng Philippine Coast Guard (PCG) sa insidente at kung ano ang pinagsimulan nito.(UNTV News)

A handout photo dated and released by Philippine Coast Guard (PCG) on 09 August 2013 shows an oil spill boom on the starboard side of an oil tanker MT Makisig on the affected area along Manila Bay, Philippines. Several barangays in the towns of Rosario and Tanza now affected by an oil spill, with fishermen forced to sell their catch at a much lower price.

MANILA, Philippines – Inihahanda na ng Philippine Coast Guard (PCG) ang kasong obstruction of justice laban sa kumpanyang Petron gayundin sa motor tanker na MT Makisig ng Herma Shipping Lines matapos tumanggi ang mga ito na makipagtulungan sa ahensya kaugnay ng malawakang oil spill sa Cavite.

Ayon kay PCG Marine Environmental Protection Command, Commodore Joel Garcia, unang nakita ang oil spill sa bayan ng Rosario na tinatayang umabot hanggang Naic, Tanza at Tarnate, Cavite.

“They refused to give the coast guard a sample of their product for no reason at all and I reminded them that its tantamount to violation of PD1829, which is obstruction of justice but despite of that info given to them that the coast guard has the authority in marine environmental protection initially they continued to defy our request,” ani Garcia.

Sa ngayon ay nasa 20-by-15 kilometers na ang nasakop ng oil spill at pinangangambahang umabot pa sa ibang lugar.

Nasa labing-limang bayan na rin ang iniulat na apektado ng masangsang na amoy, at tinatayang 500-libong litro ng diesel fuel na ang kumalat sa coastal area at karagatan ng Cavite.

“Tolerable standard with respect to oil content in sea water is 15 parts per million but based on our initial report on the ground it appears that its more or less 200 parts per million,” pahayag pa ni Garcia.

Isinailalim na sa lab testing ang mga water sample na kinolekta ng PCG sa ilang lugar na apektado ng oil spill upang mabatid kung saan nagsimula ang oil spill.

Ayon kay Garcia, kasama sa pangunahing tinitingnan nilang pinagmulan nito ang grounded vessel na MT Makisig.

Batay sa isinagawang marine lab analysis ng PCG kaninang umaga, lumalabas na magkapareho ang langis na nakuha sa dagat at langis sa MT Makisig.

Samantala, dalawang team ang agad na ipinadala ng coast guard upang pigilan ang pagkalat ng langis sa ibang lugar kabilang na ang Corregidor. (Francis Rivera / Ruth Navales, UNTV News)

MTSAT ENHANCED-IR Satellite Image
10:32 a.m., 12 August 2013 (www.pagasa.dost.gov.ph)

MANILA, Philippines – Pinag-iingat ngayon ang mga nakatira sa mabababa at bulubunduking lugar na apektado ng Bagyong Labuyo dahil sa posibilidad ng flashflood at landslides.

Sa ulat ng Philippine Atmospheric, Geophysical and Astronomical Services Administration (PAGASA), maaaring magdala ng malalakas na pag-ulan ang Typhoon Labuyo partikular sa mga lugar na may nakataas na babala ng bagyo.

Bukod sa pagbaha at pagguho ng lupa, maaari ding makaranas ng storm surge o pagbaha bunsod ng malalaking hampas ng alon ang mga nakatira sa coastal areas sa western at northern Luzon.

Sa pinakahuling ulat ng PAGASA, nakataas ang storm warning signal 1 sa Batanes, Bataan, Pampanga, Bulacan, Rizal, Northern Quezon, Polillo Island, Laguna, Cavite at Metro Manila.

Signal number 2 naman sa Zambales, Nueva Ecija, Tarlac, Aurora Province, Calayan at Babuyan Group of Islands.

Signal number 3 naman sa Cagayan Isabela, Apayao, Kalinga, Abra, Ilocos Norte, Ilocos Sur, La Union, Pangasinan, Benguet, Mt. Province, Ifugao, Nueva Vizcaya, Quirino at Northern Aurora. (UNTV News)